Insaid Sabon Tasha fo Kaduna, pipul de vex no smol. And dem de tok dia maind.
Dem no biliv se dia oun pesin Andrew Yakubu bin roja 3 billion naira kom lock di moni insaid haus dia. And im no help enibodi o.
Una go rimemba se na on February 3 EFCC pipul go break di yeye haus wia bifo bifo GMD fo NNPC, Andrew Yakubu bin de liv fo Sabon Tasha bifo im kom hama moni.
Wetin EFCC rikova dia na $7.8m and £74,000. If yu shenj di moni to naira, na 3 billion naira yu go get o.
Na im pipul kom de vex se hau di man go get dis kain moni and im no help enibodi.
"Abeg a no fit tok. Hau pesin go de haid dis kain moni fo dis awa komuniti we pipul go de sofa laik dis witaut wota and eletrik lait?" Na so won Alfa tok.
"Dis kontri de sik o. Si di bad road we wi de yuz. No gota. No lait. No wota. Na im pesin roja dis kain hevi moni kom put insaid haus de kul am wit A/C. Wai dem no shia di moni to di komuniti na? Ah ah! Kwich kain nonsense bi dat?" Na wetin Musa tok bi dat.
Fo nau, Andrew Yakubu stil de wit EFCC de esplen hau manej im get di 3 billion naira. Afta EFCC wahala, i fit bi se im go kom esplen to im komuniti wai im no help dem wit dat kain moni fo im hand.
Insaid di piksho fo onda, yu go si di man, di moni and di haus wia im bin haid am.
0 comments:
Post a Comment
Dear readers, your comments are appreciated. Please keep them relevant to the subject matter at hand.
For enquiries and other useful information, you can email us at naijalanguej@gmail.com.