Barcelona futbol pleya, Lionel Messi don get 21 monts prizin sentens fo taks wayo, bot i bi laik se im no go enta prizin o.
Fo Spain, eni sentens we no rich 2 yiez, dem de sospend am. Dat won min se Messi no go ste insaid prizin ivun fo won de.
Di court bin trai Lionel Messi along wit im fada, Jorge Horacio Messi, se dem wayo taks otoriti fo Spain of moni we rich €4.1 million ou £3.19m from 2007 to 2009.
Messi go olso pe fain of £1.7m we bi im 6 wiks salari.
Dem akiuz Messi we bi 29 yiez old se im go opun som fek fek kompeni fo Belize and Uruguay. Dem se na doz fek kompeni im yuz to doj di taks we im sopoz to pe fo di big moni we im bin mek from advataizment.
Messi bin klem se im no eva sospekt se na bad tin im du, bot di court don faind am giulti wit im fada we folo arenj di rons.
Jorge Messi olso risiv di sem sentens wit im pikin, bot dem tok se dem go apil to di Supreme Court.
0 comments:
Post a Comment
Dear readers, your comments are appreciated. Please keep them relevant to the subject matter at hand.
For enquiries and other useful information, you can email us at naijalanguej@gmail.com.